**नेवासा / मुकिंदापूर (प्रतिनिधी):**
मुकिंदापूर हद्दीतील रहिवासी नागरिकांच्या हक्काच्या अमेनिटी स्पेस तसेच ‘ओपन स्पेस’ (खुली जागा) वर आता मोठ्या व्यावसायिकांनी डल्ला मारण्यास सुरुवात केली आहे. लहान मुलांच्या खेळासाठी आणि नागरिकांच्या आरोग्यासाठी राखीव असलेल्या या मोकळ्या जागांवर चक्क **’मंगल कार्यालयासारखे’ मोठे व्यावसायिक प्रकल्प** थाटले गेल्याचा धक्कादायक प्रकार समोर आला आहे. प्रशासनाच्या उघड पाठिंब्यामुळेच हा प्रकार सुरू असल्याचा गंभीर आरोप स्थानिक रहिवाशांमधून केला जात आहे.
याबाबत सविस्तर वृत्त असे की, शासकीय नियमांनुसार कोणत्याही गृहप्रकल्पात किंवा ले-आऊटमध्ये नागरिकांच्या सार्वजनिक वापरासाठी अमेनिटी/खुली जागा (ओपन स्पेस) सोडणे बंधनकारक असते. मुकिंदापूर हद्दीत अशा अनेक जागा सोडण्यात आल्या आहेत. मात्र, या जागांवर देखरेख ठेवण्यात स्थानिक प्रशासन पूर्णपणे अपयशी ठरले आहे. याचाच फायदा घेत काही बड्या धनदांडग्यांनी आणि व्यावसायिकांनी थेट या जागेवरच कब्जा केला आहे. छोट्या-मोठ्या टपऱ्या सोडून आता थेट **भव्य मंगल कार्यालये, लॉन आणि मोठे कमर्शियल शेड** या ओपन स्पेसमध्ये उभारण्यात आले आहेत.
**नागरिकांचे जगणे असह्य; वाहतूक कोंडी आणि अस्वच्छतेचा विळखा**
निवासी भागात मंगल कार्यालयासारखे मोठे व्यावसायिक प्रकल्प सुरू झाल्यामुळे परिसरातील शांतता पूर्णपणे भंग पावली आहे. लग्नकार्ये आणि इतर समारंभांमुळे या निवासी भागात रात्री-अपरात्री मोठ्या आवाजात डीजे वाजवले जातात, ज्यामुळे रुग्ण आणि लहान मुलांच्या आरोग्याचा प्रश्न निर्माण झाला आहे. तसेच, या कार्यालयांमध्ये येणाऱ्या वाहनांमुळे मुकिंदापूर हद्दीतील अंतर्गत रस्त्यांवर प्रचंड वाहतूक कोंडी होत आहे. समारंभानंतर उरलेले खरकटं अन्न आणि कचरा याच खुल्या जागेत उघड्यावर फेकला जात असल्याने परिसरात दुर्गंधी पसरली असून डेंग्यू, मलेरियासारख्या आजारांचा धोका वाढला आहे.
**बड्या व्यावसायिकांना प्रशासनाचे अभय?**
एकीकडे गरीब नागरिकांच्या छोट्या बांधकामांवर हातोडा चालवणारी प्रशासकीय यंत्रणा, दुसरीकडे अमेनिटी /ओपन स्पेसमध्ये थाटल्या गेलेल्या एवढ्या मोठ्या मंगल कार्यालयांकडे आणि व्यावसायिक प्रकल्पांकडे डोळेझाक का करत आहे? असा संतप्त सवाल नागरिक विचारत आहेत. संबंधित विभागाच्या अधिकाऱ्यांचे आणि या बड्या व्यावसायिकांचे आर्थिक लागेबांधे असल्याशिवाय रहिवासी भागात एवढा मोठा बेकायदेशीर कारभार सुरू राहूच शकत नाही, अशी चर्चा सद्या परिसरात रंगली आहे.
> **वरिष्ठ अधिकाऱ्यांनी दखल घेण्याची मागणी…**
> “ओपन स्पेस आणि अमेनिटी स्पेस ही नागरिकांच्या विरंगुळ्यासाठी असते, तिथे मंगल कार्यालय थाटून कोणी स्वतःचे खिसे भरू शकत नाही. या मोठ्या व्यावसायिकांवर तात्काळ गुन्हे दाखल करून ही जागा शासनाने ताब्यात घ्यावी, अन्यथा आम्ही न्यायालयात दाद मागू.”
> — **संतप्त नागरिक, मुकिंदापूर परिसर.**
>
आता या बड्या आणि वजनदार व्यावसायिकांच्या बेकायदेशीर कृत्यांवर प्रशासन कारवाईचे धाडस दाखवणार की नेहमीप्रमाणे कागदी घोडे नाचवून या प्रकरणावर पांघरूण घालणार? याकडे सर्वांचे लक्ष लागले आहे.