*बॉण्डचा भंग करणाऱ्या ३ सराईत गुन्हेगारांची रक्कम शासनजमा; अप्पर पोलीस अधीक्षक सोमनाथ वाकचौरे यांची कडक कारवाई*
**श्रीरामपूर / नेवासा:**
गुन्हेगारी प्रवृत्तीला आळा घालण्यासाठी आणि परिसरात शांतता व सुव्यवस्था राखण्यासाठी श्रीरामपूर विभागाचे अप्पर पोलीस अधीक्षक तथा विशेष कार्यकारी दंडाधिकारी सोमनाथ वाकचौरे यांनी धडक पाऊल उचलले आहे. चॅप्टर केसेस (प्रतिबंधक कारवाई) अंतर्गत चांगल्या वर्तणुकीचा बॉण्ड (जमीनदारनामा) लिहून दिल्यानंतरही पुन्हा गुन्हे करणाऱ्या ३ सराईत गुन्हेगारांवर कडक कारवाई करत, त्यांच्याकडून तब्बल ९० हजार रुपयांची बॉण्ड रक्कम जप्त करून ती शासनजमा करण्याचे आदेश त्यांनी दिले आहेत.
भारतीय नागरिक सुरक्षा संहिता (BNSS) कलम ४९१ (१) अन्वये बॉण्ड भंगाची (Breach of Bond) ही कायदेशीर प्रक्रिया राबवण्यात आली आहे.
*काय आहे संपूर्ण प्रकरण?*
महाराष्ट्र शासन अधिसूचनेनुसार, श्रीरामपूर विभागाचे अप्पर पोलीस अधीक्षक सोमनाथ वाकचौरे यांना विशेष कार्यकारी दंडाधिकारी म्हणून घोषित करण्यात आले आहे. या अधिकाराचा वापर करून, श्रीरामपूर विभागातील विविध पोलीस ठाण्यांच्या हद्दीतील रेकॉर्डवरील सराईत गुन्हेगारांकडून भविष्यात शांतता राखण्यासाठी भारतीय नागरिक सुरक्षा संहिता कलम १२६, १२७, १२८, १२९ अन्वये २ वर्षांच्या मुदतीसाठी चांगल्या वर्तणुकीचे बंधपत्र (बॉण्ड) लिहून घेण्यात आले होते.
या बंधपत्रात शांततेचा भंग न करणे, दखलपात्र व अदखलपात्र गुन्हे न करणे यासारख्या कडक अटी व शर्ती नमूद होत्या. मात्र, या अटींचे उल्लंघन करून संबंधित गुन्हेगारांनी बॉण्डच्या कालावधीत पुन्हा गंभीर स्वरूपाचे गुन्हे केले.
*’या’ तीन गुन्हेगारांवर झाली कारवाई:*
अप्पर पोलीस अधीक्षक सोमनाथ वाकचौरे यांच्या न्यायालयात चाललेल्या सुनावणीअंती खालील आरोपींची बॉण्ड रक्कम जप्त करण्यात आली:
| अ.नं. | पोलीस ठाणे | गुन्हेगाराचे नाव व पत्ता | एकूण दाखल गुन्हे | शासनजमा केलेली रक्कम |
|—|—|—|—|—|
| **१** | **शनी शिंगणापूर** | नितीन मोहन राशिनकर (वय ३४, रा. रस्तापूर, ता. नेवासा, जि. अहिल्यांनगर) | ०३ | **५०,०००/- रुपये** |
| **२** | **सोनई** | अक्षय रामदास चेमटे (रा. घोडेगाव, ता. नेवासा, जि. अहिल्यांनगर) | १० | **३०,०००/- रुपये** |
| **३** | **आश्वी** | फिरोज नबाब शेख (वय ३५, रा. शेडगाव, ता. संगमनेर, जि. अहिल्यांनगर) | ०३ | **१०,०००/- रुपये** |
**एकूण जप्त रक्कम: ९०,०००/- रुपये**
‘या’ पोलीस अधिकाऱ्यांनी सादर केले प्रस्ताव
सदर गुन्हेगारांनी बॉण्डचा भंग केल्याचे निष्पन्न झाल्यानंतर, सोनई पोलीस स्टेशनचे सहाय्यक पोलीस निरीक्षक अनिल मोरे, शनी शिंगणापूर पोलीस स्टेशनचे सहाय्यक पोलीस निरीक्षक आशिष शेळके आणि आश्वी पोलीस स्टेशनचे सहाय्यक पोलीस निरीक्षक सुदाम शिरसाट यांनी संबंधित आरोपींविरुद्ध प्रतिबंधक कारवाई व बॉण्ड उल्लंघनाचे कायदेशीर प्रस्ताव अप्पर पोलीस अधीक्षक कार्यालयाकडे सादर केले होते.
> **दंडाची रक्कम न भरल्यास थेट जेल!**
> “विशेष कार्यकारी दंडाधिकारी तथा अप्पर पोलीस अधीक्षक यांच्यापुढे बंधपत्र लिहून दिल्यानंतरही जर कोणी पुन्हा गुन्हे करत असेल, तर त्यांच्यावर कडक कारवाई केली जाईल. तसेच, बॉण्ड उल्लंघनाचा हा दंड संबंधित आरोपींनी न भरल्यास, त्यांना थेट न्यायालयीन कोठडीत (जेलमध्ये) पाठवण्याची कायदेशीर तरतूद आहे,” असा सज्जड इशारा या कारवाईद्वारे देण्यात आला आहे.
>