भोंदू बाबा अशोक खरातला रसद पुरवणारा ‘तो’ बडा अधिकारी कोण? अंजली दमानियांच्या आरोपाने खळबळ; SIT कडून तपास सुरू
नाशिक:
स्वतःला ‘कॅप्टन’ म्हणवून घेणाऱ्या आणि कृष्णाचा अवतार असल्याचे सांगून महिलांचे लैंगिक शोषण करणाऱ्या अशोक खरात या भोंदू बाबाच्या कृष्णकृत्यांनी महाराष्ट्र हादरला आहे. या प्रकरणाला आता एक नवे वळण मिळाले असून, मुंबईतील एक उपजिल्हाधिकारी या भोंदूला आर्थिक रसद आणि कायदेशीर मदत पुरवत असल्याचा खळबळजनक आरोप सामाजिक कार्यकर्त्या अंजली दमानिया यांनी केला आहे. यामुळे आता या प्रकरणाचे धागेदोरे थेट मंत्रालयापर्यंत पोहोचण्याची शक्यता निर्माण झाली आहे.
SIT कडून चौकशीचा फास आवळला
राज्य सरकारने या प्रकरणाचे गांभीर्य ओळखून आयपीएस अधिकारी तेजस्वी सातपुते यांच्या नेतृत्वाखाली विशेष तपास पथकाची (SIT) स्थापना केली आहे. गुरुवारी एसआयटीने खरातची दोन तास कसून चौकशी केली. त्याच्याकडील संशयास्पद ‘पेनड्राइव्ह’ आणि मोबाइलमधील डेटा पोलिसांनी ताब्यात घेतला असून, त्यातून अनेक बड्या नेत्यांचे आणि अधिकाऱ्यांचे चेहरे समोर येण्याची शक्यता आहे.
काय आहेत अंजली दमानियांचे आरोप?
शुक्रवारी घेतलेल्या पत्रकार परिषदेत अंजली दमानिया यांनी थेट प्रशासकीय यंत्रणेवर बोट ठेवले. “मुंबईत कार्यरत असलेले एक उपजिल्हाधिकारी खरातच्या पाठीशी उभे आहेत. ते त्याला केवळ पैसेच नव्हे, तर वकीलही पुरवत आहेत,” असा गंभीर आरोप त्यांनी केला. या अधिकाऱ्याचे नाव अद्याप गुलदस्त्यात असले, तरी एसआयटीच्या तपासात हे नाव लवकरच समोर येण्याचे संकेत मिळत आहेत.
शोषणाचा ‘भयंकर’ पॅटर्न
तपासातून खरातच्या कृत्यांचा अत्यंत किळसवाणा प्रकार समोर आला आहे:
अध्यात्मिक जाळे: “मी कृष्णाचा अवतार असून तू माझी राधा आहेस,” असे सांगून तो महिलांना जाळ्यात ओढायचा.
अंमली पदार्थांचा वापर: महिलांना कडवट-खारट पाणी आणि पेढा देऊन गुंगी आणली जात असे.
मंत्रांचा आधार: गायत्री मंत्र म्हणायला सांगून आणि डोक्यावर तांब्या-लोटा ठेवून तो महिलांशी अश्लील चाळे करायचा.
फसवणूक: सोबत आलेल्या नातेवाईकांना ‘ध्यानस्थ’ पूजेच्या नावाखाली बाहेर बसवून ठेवून तो आतमध्ये महिलांवर अत्याचार करायचा.
उच्चभ्रू वर्तुळात मोठी चर्चा
अशोक खरातसोबतचे राज्यातील अनेक दिग्गज राजकारणी आणि बड्या अधिकाऱ्यांचे फोटो सध्या सोशल मीडियावर व्हायरल होत आहेत. जो भोंदू इतरांच्या भविष्याची कुंडली मांडायचा, त्याची स्वतःची ‘काळी कुंडली’ आता नाशिक पोलिसांच्या हाती लागली आहे. मुंबईतील त्या विशिष्ट उपजिल्हाधिकाऱ्याचे कनेक्शन नेमके काय आणि त्याचे खरातशी असलेले आर्थिक हितसंबंध कशासाठी होते, याचा शोध आता पोलीस घेत आहेत.
या प्रकरणामुळे संपूर्ण राज्यात संतापाची लाट असून, अशा विकृत भोंदूला पाठीशी घालणाऱ्या अधिकाऱ्यांवरही कठोर कारवाई करण्याची मागणी जोर धरू लागली आहे.