नाशिक (प्रतिनिधी) नाशिक मधील सिन्नर तालुक्यातील अंकशास्त्रज्ञ आणि स्वयंघोषित ज्योतिषी अशोक खरात याच्यावर बलात्काराचे गंभीर गुन्हे दाखल झाल्यानंतर राज्याच्या राजकारणात मोठी उलथापालथ सुरू झाली आहे. न्यायालयाने अशोक खरातला 24 मार्चपर्यंत पोलीस कोठडी सुनावली आहे. अशोक खरातवर अत्याचाराचा गुन्हा दाखल करण्यात आला असून प्रकरणाचा पुढील तपास सुरू आहे. तर राज्य महिला आयोगाच्या अध्यक्षा रुपाली चाकणकर यांचे खरात सोबतचे फोटो आणि त्याची पाद्यपूजा करतानाचा व्हिडिओ समोर आल्यानंतर त्यांच्या राजीनाम्याची मागणी अनेक समाज माध्यमातून करण्यात येत होती. अखेर रुपाली चाकणकर यांनी राज्य महिला आयोगाच्या अध्यक्षपदाचा राजीनामा दिला. राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी या प्रकरणावर प्रतिक्रिया दिली आहे.
माझे लोक देखील सांगत होते तिकडे जाऊ, पण…
छगन भुजबळ म्हणाले की, मी बातम्यातून देखील वाचतोय. मला काही त्यांच्या बाबत फार माहिती नाही. माझे लोक देखील सांगत होते की, तिकडे जाऊ. पण, मी काही गेलो नाही. अंधश्रद्धेपासून दूर राहिले पाहिजे, हे माझं वैयक्तिक मत आहे. काही चांगले साधू देखील आहेत. ते चांगले काम करत आहेत. अशोक खरातकडे फार मोठी मंडळी येत होती.पण राजकीय क्षेत्रात काम करणाऱ्यांनी काही बंधने पाळले पाहिजेत. पोलीस याबाबत देखील चौकशी करत आहेत, कारवाई होईल. चाकणकर नेहमी तिथे जात असल्यामुळे त्यांना विश्वस्त केले असेल, असे त्यांनी म्हटले.
चाकणकरांच्या राजीनाम्याबाबत प्रतिक्रिया देताना
छगन भुजबळ पुढे म्हणाले की, संविधानिक पदाबाबत मुख्यमंत्री देवेंद्र फडणवीस यांच्याशी चर्चा करून उपमुख्यमंत्री सुनेत्रा पवार यांनी निर्णय घेतला. मात्र पक्षाच्या अध्यक्ष पदाबाबत पक्षाचे वरिष्ठ नेते आणि अध्यक्ष सुनेत्रा पवार निर्णय घेतील. संपूर्ण चौकशी करून त्यावर निर्णय होतो, असे देखील भुजबळ यांनी यावेळी सांगितले. तर ज्यांच्यावर अन्याय झाला असेल ते पुढे येतील. जे अधिकारी नेमले आहेत ते सखोल चौकशी करून कारवाई करतील, असे यावेळी छगन भुजबळ म्हणाले.